jamāl-gāh-e-taġhazzul kī tāb-o-tab tirī yaad
pa tañgnā.e-ġhazal meñ samā.e kab tirī yaad

kisī khañDar se guzartī havā kā nam! tirā ġham!!
shajar pe girtī huī barf kā tarab tirī yaad

tū mujh se mere zamānoñ kā pūchhtī hai to sun!
tirā junūñ, tirā saudā, tirī talab, tirī yaad

guzar-gahoñ ko ujaḌne nahīñ diyā tū ne
kabhī yahāñ se guzartī thī tuu, aur ab tirī yaad

ye qaid-e-umr to kaTtī nazar nahīñ ātī!
bas ik qarīna! tirā dhyān, ek Dhab! tirī yaad

ba-faiz-e-dard-e-mohabbat maiñ ḳhush nasab, maiñ najīb!
mirā qabīla tirā ġham, mirā nasab tirī yaad

ba-juz hikāyat-e-tū iiñ vajūd-e-chīz-e-nīst
maiñ kul kā kul tirā qissa maiñ sab kā sab tirī yaad

darīñ gumān-kada kullo-man-alaihā-fān
bas ik chhalāvā mirā ishq, ek chhab tirī yaad

bahar sabīl-e-hunar kā safar to jaarī hai
kabhī kuchh aur bahāna, kabhū sabab tirī yaad

jamal-gah-e-taghazzul ki tab-o-tab teri yaad
pa tangnae-ghazal mein samae kab teri yaad

kisi khanDar se guzarti hawa ka nam! tera gham!!
shajar pe girti hui barf ka tarab teri yaad

tu mujh se mere zamanon ka puchhti hai to sun!
tera junun, tera sauda, teri talab, teri yaad

guzar-gahon ko ujaDne nahin diya tu ne
kabhi yahan se guzarti thi tu, aur ab teri yaad

ye qaid-e-umr to kaTti nazar nahin aati!
bas ek qarina! tera dhyan, ek Dhab! teri yaad

ba-faiz-e-dard-e-mohabbat main KHush nasab, main najib!
mera qabila tera gham, mera nasab teri yaad

ba-juz hikayat-e-tu in wajud-e-chiz-e-nist
main kul ka kul tera qissa main sab ka sab teri yaad

darin guman-kada kullo-man-alaiha-fan
bas ek chhalawa mera ishq, ek chhab teri yaad

bahar sabil-e-hunar ka safar to jari hai
kabhi kuchh aur bahana, kabhu sabab teri yaad