Subscribe to our newsletter and get our newest updates

Balraj Bakshi

  • Ghazal


kahan se manzar sameT lae nazar kahan se udhaar mange


kahāñ se manzar sameT laa.e nazar kahāñ se udhār māñge
rivāyatoñ ko na maut aa.e to zindagī intishār māñge

safar kī ye kaisī vus.ateñ haiñ ki rāsta hai na koī manzil
thakan kā ehsās bhī na utre qadam qadam rahguzār māñge

talāsh ke bāvajūd sach hai ki mere hisse meñ kuchh na aayā
ki maiñ ne ḳhushiyāñ hazār DhūñDīñ ki dard maiñ ne hazār māñge

agar vo denā hī chāhtā hai to manziloñ kā surāġh de de
agar use māñgnā hī Thahre to rāstoñ kā ġhubār māñge

kabhī achānak hī gher lete haiñ raah meñ nā-guzīr lamhe
koī kahāñ tak panāh DhūñDe koī kahāñ tak farār māñge

sazā.eñ tajvīz kar ke rakkho ye ek lamha-e-fikriya hai
ki koī 'balrāj' apnī marzī se jiine kā iḳhtiyār māñge

kahan se manzar sameT lae nazar kahan se udhaar mange
riwayaton ko na maut aae to zindagi intishaar mange

safar ki ye kaisi wusaten hain ki rasta hai na koi manzil
thakan ka ehsas bhi na utre qadam qadam rahguzar mange

talash ke bawajud sach hai ki mere hisse mein kuchh na aaya
ki main ne KHushiyan hazar DhunDin ki dard main ne hazar mange

agar wo dena hi chahta hai to manzilon ka suragh de de
agar use mangna hi Thahre to raston ka ghubar mange

kabhi achanak hi gher lete hain rah mein na-guzir lamhe
koi kahan tak panah DhunDe koi kahan tak farar mange

sazaen tajwiz kar ke rakkho ye ek lamha-e-fikriya hai
ki koi 'balraj' apni marzi se jine ka iKHtiyar mange


Source: Book : Mujalla Dastavez (Pg. 620) Author : Aziz Nabeel Publication : Edarah Dastavez (2013-14) Edition : 2013-14

Leave a comment

+