yuuñ dīda-e-ḳhūñ-bār ke manzar se uThā maiñ
tūfān uThā mujh meñ samundar se uThā maiñ

uThne ke liye qasd kiyā maiñ ne balā kā
ab log ye kahte haiñ muqaddar se uThā maiñ

pahle to ḳhad-o-ḳhāl banā.e sar-e-qirtās
phir apne ḳhad-o-ḳhāl ke andar se uThā maiñ

ik aur tarah mujh pe khulī chashm-e-tamāshā
ik aur tajallī ke barābar se uThā maiñ

hai terī mirī zaat kī yaktā.ī barābar
ġhā.eb se to ubhrā to mayassar se uThā maiñ

kyā jaane kahāñ jaane kī jaldī thī dam-e-fajr
sūraj se zarā pahle hī bistar se uThā maiñ

pathrāne lage the mire a.asāb koī dam
ḳhāmosh nigāhoñ ke barābar se uThā maiñ

ik aag mire jism meñ mahfūz thī 'āzar'
ḳhas-ḳhāna-e-zulmāt ke andar se uThā maiñ

yun dida-e-KHun-bar ke manzar se uTha main
tufan uTha mujh mein samundar se uTha main

uThne ke liye qasd kiya main ne bala ka
ab log ye kahte hain muqaddar se uTha main

pahle to KHad-o-KHal banae sar-e-qirtas
phir apne KHad-o-KHal ke andar se uTha main

ek aur tarah mujh pe khuli chashm-e-tamasha
ek aur tajalli ke barabar se uTha main

hai teri meri zat ki yaktai barabar
ghaeb se to ubhra to mayassar se uTha main

kya jaane kahan jaane ki jaldi thi dam-e-fajr
suraj se zara pahle hi bistar se uTha main

pathrane lage the mere aasab koi dam
KHamosh nigahon ke barabar se uTha main

ek aag mere jism mein mahfuz thi 'azar'
KHas-KHana-e-zulmat ke andar se uTha main

Videos
This video is playing from YouTube Videos
This video is playing from YouTube Javed Naseem