hai mohabbat sab ko us ke abru-e-ḳhamdār kī
hind meñ kyā aabrū baaqī rahī talvār kī

vasl kī shab chāndnī dīvār se jaane na paa.e
minnateñ kartā huuñ har ḳhār-e-sar-e-dīvār kī

usturā phirne se rū-e-yār par hai daur-e-ḳhat
chaal us kam-baḳht ne sīkhī hai kyā parkār kī

nashsha-e-mai kā gumāñ karne lagā vo bad-gumāñ
dekh kar surḳhī hamāre dīda-e-ḳhūñ-bār kī

ghar bhī merā muntazir hai yaar kā merī tarah
rauzan-e-dar meñ hai sūrat dīda-e-bedār kī

kahte ho ham ḳhvāb meñ aate jo tū sotā kabhī
ḳhuub kī barbād mehnat dīda-e-bedār kī

bāġh-e-ālam meñ kahāñ hai koī mujh sā rahm-dil
roz kartā huuñ ayādat nargis-e-bīmār kī

dāġh-e-sar haiñ josh-e-saudā meñ ba-rañg-e-gul mujhe
misl-e-gulbun paañv meñ kab hai shikāyat ḳhaar kī

vo ḳhudā kā dost hai aur dost hai us kā ḳhudā
kyuuñ na ho 'nāsiḳh' mohabbat haidar-e-karrār kī

hai mohabbat sab ko us ke abru-e-KHamdar ki
hind mein kya aabru baqi rahi talwar ki

wasl ki shab chandni diwar se jaane na pae
minnaten karta hun har KHar-e-sar-e-diwar ki

ustura phirne se ru-e-yar par hai daur-e-KHat
chaal us kam-baKHt ne sikhi hai kya parkar ki

nashsha-e-mai ka guman karne laga wo bad-guman
dekh kar surKHi hamare dida-e-KHun-bar ki

ghar bhi mera muntazir hai yar ka meri tarah
rauzan-e-dar mein hai surat dida-e-bedar ki

kahte ho hum KHwab mein aate jo tu sota kabhi
KHub ki barbaad mehnat dida-e-bedar ki

bagh-e-alam mein kahan hai koi mujh sa rahm-dil
roz karta hun ayaadat nargis-e-bimar ki

dagh-e-sar hain josh-e-sauda mein ba-rang-e-gul mujhe
misl-e-gulbun panw mein kab hai shikayat KHar ki

wo KHuda ka dost hai aur dost hai us ka KHuda
kyun na ho 'nasiKH' mohabbat haidar-e-karrar ki