kuchh mire shauq ne dar-parda kahā ho jaise
aaj tum aur hī tasvīr-e-hayā ho jaise

yuuñ guzartā hai tirī yaad kī vaadī meñ ḳhayāl
ḳhārzāroñ meñ koī barhana-pā ho jaise

saaz nafrat ke tarānoñ se bahalte nahīñ kyuuñ
ye bhī kuchh ahl-e-mohabbat kī ḳhatā ho jaise

vaqt ke shor meñ yuuñ chīḳh rahe haiñ lamhe
bahte paanī meñ koī Duub rahā ho jaise

kaisī gul-rañg hai mashriq kā ufuq dekh nadīm
nadī kā ḳhuuñ raat kī chaukhaT pe bahā ho jaise

yā mujhe vahm hai suntā nahīñ koī merī
yā ye duniyā hī koī koh-e-nidā ho jaise

bahr-e-zulmāt-e-junūñ meñ bhī nikal aa.ī hai raah
ishq ke haath meñ muusā kā asā ho jaise

dil ne chupke se kahā koshish-e-nākām ke baad
zahr hī dard-e-mohabbat kī davā ho jaise

dekheñ bach jaatī hai yā Dūbtī hai kashti-e-shauq
sāhil-e-fikr pe ik hashr bapā ho jaise

kuchh mere shauq ne dar-parda kaha ho jaise
aaj tum aur hi taswir-e-haya ho jaise

yun guzarta hai teri yaad ki wadi mein KHayal
KHarzaron mein koi barhana-pa ho jaise

saz nafrat ke taranon se bahalte nahin kyun
ye bhi kuchh ahl-e-mohabbat ki KHata ho jaise

waqt ke shor mein yun chiKH rahe hain lamhe
bahte pani mein koi Dub raha ho jaise

kaisi gul-rang hai mashriq ka ufuq dekh nadim
nadi ka KHun raat ki chaukhaT pe baha ho jaise

ya mujhe wahm hai sunta nahin koi meri
ya ye duniya hi koi koh-e-nida ho jaise

bahr-e-zulmat-e-junun mein bhi nikal aai hai rah
ishq ke hath mein musa ka asa ho jaise

dil ne chupke se kaha koshish-e-nakaam ke baad
zahr hi dard-e-mohabbat ki dawa ho jaise

dekhen bach jati hai ya Dubti hai kashti-e-shauq
sahil-e-fikr pe ek hashr bapa ho jaise