kisī sūrat se us mahfil meñ jā kar
muqaddar ham bhī dekheñ aazmā kar

taġhāful-kesh maiñ ne hī banāyā
use hāl-e-dil-e-shaidā sunā kar

uThā lene se to dil ke rahā maiñ
tū ab zālim vafā kar yā jafā kar

tire gulshan meñ pahuñche kaash ik din
nasīm-e-āshnā.ī raah pā kar

ḳhushī un ko mubārak ho ilāhī
vo ḳhush haiñ ḳhaak meñ mujh ko milā kar

dahan hai rashk se ġhunche kā pur-ḳhūñ
kidhar dekhā thā tum ne muskurā kar

vo sharmāte haiñ sun kar vasl kā naam
rahā huuñ maiñ jo chup to baat pā kar

huā vo bevafā.ī meñ musallam
nishān-e-turbat-e-āshiq miTā kar

gunāh apne mujhe yaad aa.e 'vahshat'
ḳhajil sā rah gayā maiñ haath uThā kar

kisi surat se us mahfil mein ja kar
muqaddar hum bhi dekhen aazma kar

taghaful-kesh main ne hi banaya
use haal-e-dil-e-shaida suna kar

uTha lene se to dil ke raha main
tu ab zalim wafa kar ya jafa kar

tere gulshan mein pahunche kash ek din
nasim-e-ashnai rah pa kar

KHushi un ko mubarak ho ilahi
wo KHush hain KHak mein mujh ko mila kar

dahan hai rashk se ghunche ka pur-KHun
kidhar dekha tha tum ne muskura kar

wo sharmate hain sun kar wasl ka nam
raha hun main jo chup to baat pa kar

hua wo bewafai mein musallam
nishan-e-turbat-e-ashiq miTa kar

gunah apne mujhe yaad aae 'wahshat'
KHajil sa rah gaya main hath uTha kar