vafā kā zikr chhiḌā thā ki raat biit ga.ī
abhī to rañg jamā thā ki raat biit ga.ī

mirī taraf chalī aatī hai niiñd ḳhvāb liye
abhī ye muzhda sunā thā ki raat biit ga.ī

maiñ raat ziist kā qissa sunāne baiTh gayā
abhī shurūa kiyā thā ki raat biit ga.ī

yahāñ to chāroñ taraf ab talak añdherā hai
kisī ne mujh se kahā thā ki raat biit ga.ī

ye kyā tilism ye pal bhar meñ raat aa bhī ga.ī
abhī to maiñ ne sunā thā ki raat biit ga.ī

shab aaj kī vo mire naam karne vaalā hai
ye inkishāf huā thā ki raat biit ga.ī

naved-e-sub.h jo sab ko sunātā phirtā thā
vo mujh se pūchh rahā thā ki raat biit ga.ī

uThe the haath duā ke liye ki raat kaTe
duā meñ aisā bhī kyā thā ki raat biit ga.ī

ḳhushī zarūr thī 'taimūr' din nikalne kī
magar ye ġham bhī sivā thā ki raat biit ga.ī

wafa ka zikr chhiDa tha ki raat bit gai
abhi to rang jama tha ki raat bit gai

meri taraf chali aati hai nind KHwab liye
abhi ye muzhda suna tha ki raat bit gai

main raat zist ka qissa sunane baiTh gaya
abhi shurua kiya tha ki raat bit gai

yahan to chaaron taraf ab talak andhera hai
kisi ne mujh se kaha tha ki raat bit gai

ye kya tilism ye pal bhar mein raat aa bhi gai
abhi to main ne suna tha ki raat bit gai

shab aaj ki wo mere nam karne wala hai
ye inkishaf hua tha ki raat bit gai

nawed-e-subh jo sab ko sunata phirta tha
wo mujh se puchh raha tha ki raat bit gai

uThe the hath dua ke liye ki raat kaTe
dua mein aisa bhi kya tha ki raat bit gai

KHushi zarur thi 'taimur' din nikalne ki
magar ye gham bhi siwa tha ki raat bit gai