ḳhud se bichhaḌ ke zaat ke paikar meñ qaid huuñ
ghar se nikal gayā thā magar ghar meñ qaid huuñ
huuñ na.ara-e-jihād bhī azm-e-javān bhī
dil meñ kabhī muqīm thā ab sar meñ qaid huuñ
mushtāq-o-muntazir huuñ ki chiñgāriyāñ mileñ
kyā ḳhuub aag ho ke bhī patthar meñ qaid huuñ
dekho to kā.enāt dikhā.ī de zer-e-pā
sochūñ to jaise ḳhud hī samundar meñ qaid huuñ
vo to bulā rahe haiñ magar ai 'naresh' maiñ
apnī anā ke gumbad-e-be-dar meñ qaid huuñ
KHud se bichhaD ke zat ke paikar mein qaid hun
ghar se nikal gaya tha magar ghar mein qaid hun
hun nara-e-jihad bhi azm-e-jawan bhi
dil mein kabhi muqim tha ab sar mein qaid hun
mushtaq-o-muntazir hun ki chingariyan milen
kya KHub aag ho ke bhi patthar mein qaid hun
dekho to kaenat dikhai de zer-e-pa
sochun to jaise KHud hi samundar mein qaid hun
wo to bula rahe hain magar ai 'naresh' main
apni ana ke gumbad-e-be-dar mein qaid hun
Source:
Leave a comment