hai aarzū ye jī meñ us kī galī meñ jāveñ
aur ḳhaak apne sar par man māntī uḌāveñ

shor-e-junūñ hai ham ko aur fasl-e-gul bhī aa.ī
ab chaak kar garebāñ kyūñkar na ban meñ jāveñ

be-dard log sab haiñ hamdard ek bhī nahīñ
yaaro ham apne dukh ko jā kis ke ta.iiñ sunāveñ

ye aarzū hamārī muddat se hai ki jā kar
qātil kī teġh ke ta.iiñ apnā lahū chaTāveñ

ḳhajlat se ḳhuuñ meñ Duube yā aag se lage uTh
laala ke ta.iiñ chaman meñ gar dāġh-e-dil dikhāveñ

be-iḳhtiyār sun kar mahfil meñ sham.a ro de
ham baat soz-e-dil kī gar Tuk zabāñ pe lāveñ

yahāñ yaar aur bardār koī nahīñ kisī kā
duniyā ke biich 'tābāñ' ham kis se dil lagāveñ

hai aarzu ye ji mein us ki gali mein jawen
aur KHak apne sar par man manti uDawen

shor-e-junun hai hum ko aur fasl-e-gul bhi aai
ab chaak kar gareban kyunkar na ban mein jawen

be-dard log sab hain hamdard ek bhi nahin
yaro hum apne dukh ko ja kis ke tain sunawen

ye aarzu hamari muddat se hai ki ja kar
qatil ki tegh ke tain apna lahu chaTawen

KHajlat se KHun mein Dube ya aag se lage uTh
lala ke tain chaman mein gar dagh-e-dil dikhawen

be-iKHtiyar sun kar mahfil mein shama ro de
hum baat soz-e-dil ki gar Tuk zaban pe lawen

yahan yar aur bardar koi nahin kisi ka
duniya ke bich 'taban' hum kis se dil lagawen