parvāna jal ke sāhab-e-kirdār ban gayā
lekin jamāl-e-sham.a gunāhgār ban gayā

ham dil-zade jo sair-e-chaman ko nikal paḌe
har phuul dast-e-shāḳh meñ talvār ban gayā

imshab tulū-e-yār kā manzar ajiib thā
bām-e-buland matla-e-anvār ban gayā

ai mahvashān-e-shahr mirī bandagī karo
maiñ ḳhud sañvar ke aks-e-ruḳh-e-yār ban gayā

vo daur the nazar pe hijāb-e-ġhurūr thā
vo chal diye maiñ dīda-e-bedār ban gayā

jab ḳhāmushī hī bazm kā dastūr ho ga.ī
maiñ aadmī se naqsh-ba-dīvār ban gayā

mahsūs kar rahā huuñ ki tanhā huuñ in dinoñ
har shahar garche misr kā bāzār ban gayā

jis ham-nafas ko mujh se matā-e-vafā milī
vo ham-nafas mirā hī ḳharīdār ban gayā

parwana jal ke sahab-e-kirdar ban gaya
lekin jamal-e-shama gunahgar ban gaya

hum dil-zade jo sair-e-chaman ko nikal paDe
har phul dast-e-shaKH mein talwar ban gaya

imshab tulu-e-yar ka manzar ajib tha
baam-e-buland matla-e-anwar ban gaya

ai mahwashan-e-shahr meri bandagi karo
main KHud sanwar ke aks-e-ruKH-e-yar ban gaya

wo daur the nazar pe hijab-e-ghurur tha
wo chal diye main dida-e-bedar ban gaya

jab KHamushi hi bazm ka dastur ho gai
main aadmi se naqsh-ba-diwar ban gaya

mahsus kar raha hun ki tanha hun in dinon
har shahar garche misr ka bazar ban gaya

jis ham-nafas ko mujh se mata-e-wafa mili
wo ham-nafas mera hi KHaridar ban gaya

Source: Funoon(Jadeed Ghazal Number: Volume-002)