na Dagmagā.e kabhī ham vafā ke raste meñ
charāġh ham ne jalā.e havā ke raste meñ

kise lagā.e gale aur kahāñ kahāñ Thahre
hazār ġhuncha-o-gul haiñ sabā ke raste meñ

ḳhudā kā naam koī le to chauñk uThte haiñ
mile haiñ ham ko vo rahbar ḳhudā ke raste meñ

kahīñ salāsil-e-tasbīh aur kahīñ zunnār
bichhe haiñ daam bahut mudda.ā ke raste meñ

abhī vo manzil-e-fikr-o-nazar nahīñ aa.ī
hai aadmī abhī jurm o sazā ke raste meñ

haiñ aaj bhī vahī dār-o-rasan vahī zindāñ
har ik nigāh-e-rumūz-āshnā ke raste meñ

ye nafratoñ kī fasīleñ jahālatoñ ke hisār
na rah sakeñge hamārī sadā ke raste meñ

miTā sake na koī sail-e-inqalāb jinheñ
vo naqsh chhoḌe haiñ ham ne vafā ke raste meñ

zamāna ek sā 'jālib' sadā nahīñ rahtā
chaleñge ham bhī kabhī sar uThā ke raste meñ

na Dagmagae kabhi hum wafa ke raste mein
charagh hum ne jalae hawa ke raste mein

kise lagae gale aur kahan kahan Thahre
hazar ghuncha-o-gul hain saba ke raste mein

KHuda ka nam koi le to chaunk uThte hain
mile hain hum ko wo rahbar KHuda ke raste mein

kahin salasil-e-tasbih aur kahin zunnar
bichhe hain dam bahut muddaa ke raste mein

abhi wo manzil-e-fikr-o-nazar nahin aai
hai aadmi abhi jurm o saza ke raste mein

hain aaj bhi wahi dar-o-rasan wahi zindan
har ek nigah-e-rumuz-ashna ke raste mein

ye nafraton ki fasilen jahaalaton ke hisar
na rah sakenge hamari sada ke raste mein

miTa sake na koi sail-e-inqalab jinhen
wo naqsh chhoDe hain hum ne wafa ke raste mein

zamana ek sa 'jalib' sada nahin rahta
chalenge hum bhi kabhi sar uTha ke raste mein

Source: Book : kulliyat-e-habib jaalib (Pg. 80)