arsa-e-ḳhvāb se uTh halqa-e-ta.abīr meñ aa
gum-shuda ro.ab-e-junūñ kāsa-e-tash.hīr meñ aa

intihā mabdā-e-hastī kī fanā hai yā baqā
ġhaur se dekhte haiñ baḳht kī tasvīr meñ aa

ai ḳharābāt-e-tanaffur ke pareshān makīñ
gar sukūñ chāhtā hai ishq kī ta.amīr meñ aa

hiddat-e-dīd nigāhoñ kī ibārat se nikal
aur yaḳh-basta mire rauzan-e-tahrīr meñ aa

chaḌh ke phir sar pe mire bole asīrī kā ḳhumār
qaid kar le mujhe phir zulf kī zanjīr meñ aa

ahd-e-māzī ke ḳhush-ā.ind bhaTakte lamhe
vaqt aa pahūñchā hai ab haal kī jāgīr meñ aa

jal-bujhe garmī-e-anfās se donoñ kā vajūd
gholne ḳhud ko mire qurb kī tāsīr meñ aa

lazzat-e-vasl ko hāsil ho zamīñ kī jannat
mujh se milne ke liye vādī-e-kashmīr meñ aa

zer-e-pā rakh ke sabhī aks-e-fusūn-e-taqdīr
phir javāñ hone ko gahvāra-e-tadbīr meñ aa

ai ḳhizāñ-zād agar chāhtā hai rizq-e-bahār
dāman-e-zīst liye rauza-e-shabbīr meñ aa

ājizī kahne lagī gar ho bulandī kī talab
dil jhukā dā.ira-e-na.ara-e-takbīr meñ aa

diyā ugte hue sūraj ne ye paiġhām 'nadīm'
in añdheroñ se nikal ḳhema-e-tanvīr meñ aa

arsa-e-KHwab se uTh halqa-e-tabir mein aa
gum-shuda roab-e-junun kasa-e-tashhir mein aa

intiha mabda-e-hasti ki fana hai ya baqa
ghaur se dekhte hain baKHt ki taswir mein aa

ai KHarabaat-e-tanaffur ke pareshan makin
gar sukun chahta hai ishq ki tamir mein aa

hiddat-e-did nigahon ki ibarat se nikal
aur yaKH-basta mere rauzan-e-tahrir mein aa

chaDh ke phir sar pe mere bole asiri ka KHumar
qaid kar le mujhe phir zulf ki zanjir mein aa

ahd-e-mazi ke KHush-aind bhaTakte lamhe
waqt aa pahuncha hai ab haal ki jagir mein aa

jal-bujhe garmi-e-anfas se donon ka wajud
gholne KHud ko mere qurb ki tasir mein aa

lazzat-e-wasl ko hasil ho zamin ki jannat
mujh se milne ke liye wadi-e-kashmir mein aa

zer-e-pa rakh ke sabhi aks-e-fusun-e-taqdir
phir jawan hone ko gahwara-e-tadbir mein aa

ai KHizan-zad agar chahta hai rizq-e-bahaar
daman-e-zist liye rauza-e-shabbir mein aa

aajizi kahne lagi gar ho bulandi ki talab
dil jhuka daira-e-nara-e-takbir mein aa

diya ugte hue suraj ne ye paigham 'nadim'
in andheron se nikal KHema-e-tanwir mein aa