tirā mai-ḳhvār ḳhush-āġhāz-o-ḳhush-anjām hai saaqī
ki dil meñ yaad terī lab pe terā naam hai saaqī

muhīt daur-e-sāġhar charḳh-e-nīlī-fām hai saaqī
ġhulām-e-chashm-e-maigūñ gardish-e-ayyām hai saaqī

dil-e-nākām ko ulfat se terī kaam hai saaqī
mohabbat be-niyāz-e-ibrat-e-anjām hai saaqī

zamāne se alag ho kar mujhe duniyā-e-ulfat meñ
tirā ruḳh roz-e-raushan zulf terī shaam hai saaqī

isī meñ aa ga.ī hai khiñch ke saaqī ruuh taqvā kī
matā-e-dīn-o-īmāñ qīmat-e-ik-jām hai saaqī

ḳhudā rakkhe tirī zulf-e-mo.ambar ke tasavvur se
taḳhayyul merā ambar-bīz-o-ambar-fām hai saaqī

ḳhudārā is taraf bhī ik nigāh-e-lutf ho jaa.e
mirī hastī hama hasrat hama ālām hai saaqī

hue haiñ dil pe is se munkashif asrār hastī ke
navā-e-qulqul-e-mīnā mujhe ilhām hai saaqī

sharaf terī ġhulāmī kā baḌī mushkil se miltā hai

zahe-qismat jo terā banda-e-be-dām hai saaqī

azal se tā-abad yūñhī rahegā ḳhāk-e-mai-ḳhāna
'ġhubār'-e-ḳhasta-o-nākām jis kā naam hai saaqī

tera mai-KHwar KHush-aghaz-o-KHush-anjam hai saqi
ki dil mein yaad teri lab pe tera nam hai saqi

muhit daur-e-saghar charKH-e-nili-fam hai saqi
ghulam-e-chashm-e-maigun gardish-e-ayyam hai saqi

dil-e-nakaam ko ulfat se teri kaam hai saqi
mohabbat be-niyaz-e-ibrat-e-anjam hai saqi

zamane se alag ho kar mujhe duniya-e-ulfat mein
tera ruKH roz-e-raushan zulf teri sham hai saqi

isi mein aa gai hai khinch ke saqi ruh taqwa ki
mata-e-din-o-iman qimat-e-ik-jam hai saqi

KHuda rakkhe teri zulf-e-moambar ke tasawwur se
taKHayyul mera ambar-biz-o-ambar-fam hai saqi

KHudara is taraf bhi ek nigah-e-lutf ho jae
meri hasti hama hasrat hama aalam hai saqi

hue hain dil pe is se munkashif asrar hasti ke
nawa-e-qulqul-e-mina mujhe ilham hai saqi

sharaf teri ghulami ka baDi mushkil se milta hai

zahe-qismat jo tera banda-e-be-dam hai saqi

azal se ta-abad yunhi rahega KHak-e-mai-KHana
'ghubar'-e-KHasta-o-nakaam jis ka nam hai saqi

Source: Sawad-e-sham