chup khaḌe haiñ darmiyān-e-ka.abā-o-but-ḳhāna ham
kis taraf jaa.eñ batā ai jalva-e-jānāna ham

azmat-e-rafta se itne ho ga.e begāna ham
ban ga.e haiñ apnī hī nazroñ meñ aaj afsāna ham

haa.e ye majmūa-e-sar-mastī-o-kaif-o-ḳhumār
tak rahe haiñ terī āñkhoñ ko liye paimāna ham

bevafā sham.eñ bahar-sū DhūñDhtī haiñ ab hameñ
miT ga.e jab sūrat-e-ḳhākistar-e-parvāna ham

haiñ nigāhoñ meñ abhī tak tuur kī rusvā.iyāñ
ab kahāñ jur.at ki dekheñ jalva-e-jānāna ham

ārzū-e-sajda-rezī had se baḌh jaatī hai jab
sar tire qadmoñ pe rakh dete haiñ betābāna ham

pā-e-sāqī tak jabīn-e-shauq ko pahuñchā diyā
tere mamnūn-e-karam haiñ laġhzish-e-mastāna ham

chup khaDe hain darmiyan-e-kaba-o-but-KHana hum
kis taraf jaen bata ai jalwa-e-jaanana hum

azmat-e-rafta se itne ho gae begana hum
ban gae hain apni hi nazron mein aaj afsana hum

hae ye majmua-e-sar-masti-o-kaif-o-KHumar
tak rahe hain teri aankhon ko liye paimana hum

bewafa shamen bahar-su DhunDhti hain ab hamein
miT gae jab surat-e-KHakistar-e-parwana hum

hain nigahon mein abhi tak tur ki ruswaiyan
ab kahan jurat ki dekhen jalwa-e-jaanana hum

aarzu-e-sajda-rezi had se baDh jati hai jab
sar tere qadmon pe rakh dete hain betabana hum

pa-e-saqi tak jabin-e-shauq ko pahuncha diya
tere mamnun-e-karam hain laghzish-e-mastana hum

Source: Haft Rang(Bijnor Ke Muqami Shora ka Intikhab-e-kalam)