ḳhatā maiñ ne koī bhārī nahīñ kī
amīr-e-shahr se yaarī nahīñ kī

mire aiboñ ko ginvāyā to sab ne
kisī ne merī ġham-ḳhvārī nahīñ kī

mire sheroñ meñ kyā tāsīr hotī
kabhī maiñ ne adākārī nahīñ kī

kisī mansab kisī ohde kī ḳhātir
koī tadbīr bāzārī nahīñ kī

bas itnī baat par duniyā ḳhafā hai
ki maiñ ne tujh se ġhaddārī nahīñ kī

KHata main ne koi bhaari nahin ki
amir-e-shahr se yari nahin ki

mere aibon ko ginwaya to sab ne
kisi ne meri gham-KHwari nahin ki

mere sheron mein kya tasir hoti
kabhi main ne adakari nahin ki

kisi mansab kisi ohde ki KHatir
koi tadbir bazari nahin ki

bas itni baat par duniya KHafa hai
ki main ne tujh se ghaddari nahin ki