Subscribe to our newsletter and get our newest updates

Hairat shimlavii

  • Ghazal


ek to KHud apni ghamgini


ik to ḳhud apnī ġhamgīnī
us par un kī nukta-chīnī

apnī shīrīnī bhī talḳhī
un kī talḳhī bhī shīrīnī

khul jā.egā ye bhī ik din
kis ne kis kī rāhat chhīnī

kaafī hai kyā ye kah denā
sab hālāt kī hai sañgīnī

kar nahīñ saktī ham ko qaa.il
sirf ibārat kī rañgīnī

hai ye vafā vo jurm-e-mohabbat
hai jis ke pādāsh yaqīnī

kyā ma.alūm kisī kī mushkil
ḳhuddārī hai yā ḳhud-bīnī

aap kī rā-e-ālī kyā hai
diin hai behtar yā be-dīnī

kyā kahnā us hosh-o-ḳhirad kā
sūjhtī hai jis kī shauqīnī

apne dāman ko bhī dekheñ
ho manzūr jinheñ gul-chīnī

achchhe achchhoñ ko ai hairat
le Duubī hai be-ā.īñī

ek to KHud apni ghamgini
us par un ki nukta-chini

apni shirini bhi talKHi
un ki talKHi bhi shirini

khul jaega ye bhi ek din
kis ne kis ki rahat chhini

kafi hai kya ye kah dena
sab haalat ki hai sangini

kar nahin sakti hum ko qail
sirf ibarat ki rangini

hai ye wafa wo jurm-e-mohabbat
hai jis ke padash yaqini

kya malum kisi ki mushkil
KHuddari hai ya KHud-bini

aap ki ra-e-ali kya hai
din hai behtar ya be-dini

kya kahna us hosh-o-KHirad ka
sujhti hai jis ki shauqini

apne daman ko bhi dekhen
ho manzur jinhen gul-chini

achchhe achchhon ko ai hairat
le Dubi hai be-aini


Source: Book : NUQOOSH (Pg. 176) Author : Mohammad Tufail Publication : Idarah Forogh-e-urdu, Lahore (Vol. 61,62Edition Jun/ Feb 1957) Edition : Vol. 61,62Edition Jun/ Feb 1957

Leave a comment

+