Subscribe to our newsletter and get our newest updates

Habib Jalib

  • Ghazal


phir dil se aa rahi hai sada us gali mein chal


phir dil se aa rahī hai sadā us galī meñ chal
shāyad mile ġhazal kā patā us galī meñ chal

kab se nahīñ huā hai koī sher kaam kā
ye sher kī nahīñ hai fazā us galī meñ chal

vo baam o dar vo log vo rusvā.iyoñ ke zaḳhm
haiñ sab ke sab aziiz judā us galī meñ chal

us phuul ke baġhair bahut jī udaas hai
mujh ko bhī saath le ke sabā us galī meñ chal

duniyā to chāhtī hai yūñhī fāsle raheñ
duniyā ke mashvaroñ pe na jā us galī meñ chal

be-nūr o be-asar hai yahāñ kī sadā-e-sāz
thā us sukūt meñ bhī mazā us galī meñ chal

'jālib' pukārtī haiñ vo sholā-navā.iyāñ
ye sard rut ye sard havā us galī meñ chal

phir dil se aa rahi hai sada us gali mein chal
shayad mile ghazal ka pata us gali mein chal

kab se nahin hua hai koi sher kaam ka
ye sher ki nahin hai faza us gali mein chal

wo baam o dar wo log wo ruswaiyon ke zaKHm
hain sab ke sab aziz juda us gali mein chal

us phul ke baghair bahut ji udas hai
mujh ko bhi sath le ke saba us gali mein chal

duniya to chahti hai yunhi fasle rahen
duniya ke mashwaron pe na ja us gali mein chal

be-nur o be-asar hai yahan ki sada-e-saz
tha us sukut mein bhi maza us gali mein chal

'jalib' pukarti hain wo shola-nawaiyan
ye sard rut ye sard hawa us gali mein chal


Leave a comment

+