vo aa.egā dil se duā to karo
namāz-e-mohabbat adā to karo

milegā koī ban ke unvān bhī
kahānī kī tum ibtidā to karo

samajhne lagoge nazar kī zabāñ
mohabbat se dil āshnā to karo

tumheñ maar Dāleñgī tanhā.iyāñ
hameñ apne dil se judā to karo

tumhāre karam se hai ye zindagī
maiñ bujh jā.ūñgā tum havā to karo

hazāroñ manāzir nigāhoñ meñ haiñ
rukoge kahāñ faisla to karo

pukāre tumheñ kūcha-e-ārzū
kabhī 'naqsh' dil kā kahā to karo

wo aaega dil se dua to karo
namaz-e-mohabbat ada to karo

milega koi ban ke unwan bhi
kahani ki tum ibtida to karo

samajhne lagoge nazar ki zaban
mohabbat se dil aashna to karo

tumhein mar Dalengi tanhaiyan
hamein apne dil se juda to karo

tumhaare karam se hai ye zindagi
main bujh jaunga tum hawa to karo

hazaron manazir nigahon mein hain
rukoge kahan faisla to karo

pukare tumhein kucha-e-arzu
kabhi 'naqsh' dil ka kaha to karo