Subscribe to our newsletter and get our newest updates

Dagh Dehlvi

  • Ghazal


sabaq aisa paDha diya tu ne


sabaq aisā paḌhā diyā tū ne
dil se sab kuchh bhalā diyā tū ne

ham nikamme hue zamāne ke
kaam aisā sikhā diyā tū ne

kuchh ta.alluq rahā na duniyā se
shaġhl aisā batā diyā tū ne

kis ḳhushī kī ḳhabar sunā ke mujhe
ġham kā putlā banā diyā tū ne

kyā batā.ūñ ki kyā liyā maiñ ne
kyā kahūñ maiñ kī kyā diyā tū ne

be-talab jo milā milā mujh ko
be-ġharaz jo diyā diyā tū ne

umr-e-jāved ḳhizr ko baḳhshī
āb-e-haivāñ pilā diyā tū ne

nār-e-namrūd ko kiyā gulzār
dost ko yuuñ bachā diyā tū ne

dast-e-mūsā meñ faiz baḳhshish hai
nūr-o-lauh-o-asā diyā tū ne

sub.h mauj nasīm gulshan ko
nafas-e-jāñ-fazā diyā tū ne

shab-e-tīra meñ sham.a raushan ko
nuur ḳhurshīd kā diyā tū ne

naġhma bulbul ko rañg-o-bū gul ko
dil-kash-o-ḳhushnumā diyā tū ne

kahīñ mushtāq se hijāb huā
kahīñ parda uThā diyā tū ne

thā mirā muñh na qābil-e-labbaik
ka.aba mujh ko dikhā diyā tū ne

jis qadar maiñ ne tujh se ḳhvāhish kī
is se mujh ko sivā diyā tū ne

rahbar-e-ḳhizr-o-hādī-e-ilyās
mujh ko vo rahnumā diyā tū ne

miT ga.e dil se naqsh-e-bātil sab
naqsha apnā jamā diyā tū ne

hai yahī raah manzil-e-maqsūd
ḳhuub raste lagā diyā tū ne

mujh gunahgār ko jo baḳhsh diyā
to jahannum ko kyā diyā tū ne

'dāġh' ko kaun dene vaalā thā
jo diyā ai ḳhudā diyā tū ne

sabaq aisa paDha diya tu ne
dil se sab kuchh bhala diya tu ne

hum nikamme hue zamane ke
kaam aisa sikha diya tu ne

kuchh talluq raha na duniya se
shaghl aisa bata diya tu ne

kis KHushi ki KHabar suna ke mujhe
gham ka putla bana diya tu ne

kya bataun ki kya liya main ne
kya kahun main ki kya diya tu ne

be-talab jo mila mila mujh ko
be-gharaz jo diya diya tu ne

umr-e-jawed KHizr ko baKHshi
aab-e-haiwan pila diya tu ne

nar-e-namrud ko kiya gulzar
dost ko yun bacha diya tu ne

dast-e-musa mein faiz baKHshish hai
nur-o-lauh-o-asa diya tu ne

subh mauj nasim gulshan ko
nafas-e-jaan-faza diya tu ne

shab-e-tira mein shama raushan ko
nur KHurshid ka diya tu ne

naghma bulbul ko rang-o-bu gul ko
dil-kash-o-KHushnuma diya tu ne

kahin mushtaq se hijab hua
kahin parda uTha diya tu ne

tha mera munh na qabil-e-labbaik
kaba mujh ko dikha diya tu ne

jis qadar main ne tujh se KHwahish ki
is se mujh ko siwa diya tu ne

rahbar-e-KHizr-o-hadi-e-ilyas
mujh ko wo rahnuma diya tu ne

miT gae dil se naqsh-e-baatil sab
naqsha apna jama diya tu ne

hai yahi rah manzil-e-maqsud
KHub raste laga diya tu ne

mujh gunahgar ko jo baKHsh diya
to jahannum ko kya diya tu ne

'dagh' ko kaun dene wala tha
jo diya ai KHuda diya tu ne

Videos
This video is playing from YouTube Videos
This video is playing from YouTube Suman Kalyanpur

Source: Book : kulliyat-e-dagh (Pg. 338) Author : Nawab Fasihul Mulk Bahadur Hazrat Dagh Dehlvi Publication : Kitabi Duniya (2008) Edition : 2008

Leave a comment

+