kyā kahūñ vo kidhar nahīñ rahtā
haañ magar is nagar nahīñ rahtā

tū ho terā ḳhayāl ho yā ḳhvāb
koī bhī raat bhar nahīñ rahtā

jab sukūñ hī na de sake to phir
ghar kisī taur ghar nahīñ rahtā

jis ghaḌī chāho tum chale aao
maiñ koī chāñd par nahīñ rahtā

yuuñ to apnī bhī justujū hai mujhe
tujh se bhī be-ḳhabar nahīñ rahtā

dil-figāroñ ke shahr meñ 'tābish'
ek bhī baḳhiya-gar nahīñ rahtā

kya kahun wo kidhar nahin rahta
han magar is nagar nahin rahta

tu ho tera KHayal ho ya KHwab
koi bhi raat bhar nahin rahta

jab sukun hi na de sake to phir
ghar kisi taur ghar nahin rahta

jis ghaDi chaho tum chale aao
main koi chand par nahin rahta

yun to apni bhi justuju hai mujhe
tujh se bhi be-KHabar nahin rahta

dil-figaron ke shahr mein 'tabish'
ek bhi baKHiya-gar nahin rahta

Source: Book : Pakistani Adab (Pg. 388) Author : Dr. Rashid Amjad Publication : Pakistan Academy of Letters, Islambad, Pakistan (2009) Edition : 2009