kis se pūchhūñ haa.e maiñ is dil ke samjhāne kī tarah
saath tiflāñ ke lagā phirtā hai dīvāne kī tarah

yaar ke paañv pe sar rakh jī ko apne dījiye
is se behtar aur nahīñ hotī hai mar jaane kī tarah

kab pilāvegā tū ai saaqī mujhe jām-e-sharāb
jāñ-ba-lab huuñ aarzū meñ mai kī paimāne kī tarah

mast aatā hai piye mai aaj vo qātil mirā
kuchh nazar aatī hai mujh ko apne jī jaane kī tarah

sham.a-rū ke gird phirtī haiñ sadā qurbān ho
chashm merī par lagā mizhgāñ ke parvāne kī tarah

baaġh meñ gul ne kiyā apne ta.iiñ lohūluhān
dekh us ġhuncha-dahan ke paan ke khāne kī tarah

fasl-e-gul aa.ī hai 'tābāñ' ghar meñ kyā baiThā hai yuuñ
kar garebāñ chaak jā sahrā meñ dīvāne kī tarah

kis se puchhun hae main is dil ke samjhane ki tarah
sath tiflan ke laga phirta hai diwane ki tarah

yar ke panw pe sar rakh ji ko apne dijiye
is se behtar aur nahin hoti hai mar jaane ki tarah

kab pilawega tu ai saqi mujhe jam-e-sharab
jaan-ba-lab hun aarzu mein mai ki paimane ki tarah

mast aata hai piye mai aaj wo qatil mera
kuchh nazar aati hai mujh ko apne ji jaane ki tarah

shama-ru ke gird phirti hain sada qurban ho
chashm meri par laga mizhgan ke parwane ki tarah

bagh mein gul ne kiya apne tain lohuluhan
dekh us ghuncha-dahan ke pan ke khane ki tarah

fasl-e-gul aai hai 'taban' ghar mein kya baiTha hai yun
kar gareban chaak ja sahra mein diwane ki tarah