bahār aadhī guzar ga.ī haa.e ham qaidī haiñ zindāñ ke
ga.e kuchh aur kuchh jaate haiñ din chāk-e-garebāñ ke

hazāroñ ḳhūb-rū ga.e ḳhaak meñ gardish se daurāñ ke
jhalakte rañg meñ dekho muqayyash reze afshāñ ke

gayā to dard-e-sar par hasrat-e-zaḳhm-e-doyam rah ga.ī
vagarna ham tirī shamshīr ke maare haiñ ehsāñ ke

mirā lohū bhī ba.ad-az-marg qātil ke tasadduq hai
sañjāf-e-surḳh mat samjhe koī gird is ke dāmāñ ke

huā hai daaġh be-qadrī se un kī musht-ḳhūñ merā
paḌe ko.ele hī kab mehñdī meñ dast-o-pā-e-ḳhūbāñ ke

junūñ se ḳhaak ho ga.e par bhī āshiq haat malte haiñ
bagūle saare meñ aTkal kiyā 'uzlat' bayābāñ ke

bahaar aadhi guzar gai hae hum qaidi hain zindan ke
gae kuchh aur kuchh jate hain din chaak-e-gareban ke

hazaron KHub-ru gae KHak mein gardish se dauran ke
jhalakte rang mein dekho muqayyash reze afshan ke

gaya to dard-e-sar par hasrat-e-zaKHm-e-doyam rah gai
wagarna hum teri shamshir ke mare hain ehsan ke

mera lohu bhi baad-az-marg qatil ke tasadduq hai
sanjaf-e-surKH mat samjhe koi gird is ke daman ke

hua hai dagh be-qadri se un ki musht-KHun mera
paDe koele hi kab mehndi mein dast-o-pa-e-KHuban ke

junun se KHak ho gae par bhi aashiq hat malte hain
bagule sare mein aTkal kiya 'uzlat' bayaban ke