pilā saaqī bahār aa.e na aa.e
ghaTā phir baar baar aa.e na aa.e

tujhe ham dekhne ā.eñge sau baar
koī dīvāna-vār aa.e na aa.e

kahe jā.eñge dard-e-dil ham apnā
kisī ko e'tibār aa.e na aa.e

vo aa jaa.eñ idhar khole hue baal
nasīm mushk-bār aa.e na aa.e

tumheñ ārām se sonā mubārak
mujhe shab bhar qarār aa.e na aa.e

havā-e-shauq meñ ab uḌ chale ham
havā-e-kū-e-yār aa.e na aa.e

tire dil meñ masarrat ke khileñ phuul
mire dil meñ bahār aa.e na aa.e

'jalīl' ab mai-kashī kā lutf uThāo
phir abr-e-nau-bahār aa.e na aa.e

pila saqi bahaar aae na aae
ghaTa phir bar bar aae na aae

tujhe hum dekhne aaenge sau bar
koi diwana-war aae na aae

kahe jaenge dard-e-dil hum apna
kisi ko e'tibar aae na aae

wo aa jaen idhar khole hue baal
nasim mushk-bar aae na aae

tumhein aaram se sona mubarak
mujhe shab bhar qarar aae na aae

hawa-e-shauq mein ab uD chale hum
hawa-e-ku-e-yar aae na aae

tere dil mein masarrat ke khilen phul
mere dil mein bahaar aae na aae

'jalil' ab mai-kashi ka lutf uThao
phir abr-e-nau-bahaar aae na aae

Source: Book : Kainat-e-Jalil Manakpuri (Pg. 339)