ḳhvāhāñ tire har rañg meñ ai yaar hamīñ the
yūsuf thā agar tū to ḳharīdār hamīñ the

be-dād kī mahfil meñ sazā-vār hamīñ the
taqsīr kisī kī ho gunahgār hamīñ the

va.ada thā hamīñ se lab-e-bām aane kā honā
saaye kī tarah se pas-e-dīvār hamīñ the

kañghī tirī zulfoñ kī hamīñ par thī muqarrar
ā.īna dikhāte tujhe har baar hamīñ the

ne.amat thī tire husn kī hisse meñ hamāre
tū kān-e-malāhat thā ḳharīdār hamīñ the

saudā-zada zulfoñ kā na thā apne sivā ek
āzād do-ālam thā giraftār hamīñ the

tū aur ham ai dost the yak-jān do qālib
thā ġhair sivā apne jo thā yaar hamīñ the

bīmār-e-mohabbat thā sivā apne na koī
ik mustahiq-e-sharbat-e-dīdār hamīñ the

be apne bahaltī thī tabī.at na kisī se
dil-soz hamīñ the tire ġham-ḳhvār hamīñ the

ik jumbish-e-mizhgāñ se ġhash aatā thā hamīñ ko
do nargis-e-bīmār ke bīmār hamīñ the

jab chāhte the lete the āġhosh meñ tum ko
majbūr se rah jaate the muḳhtār hamīñ the

ham sā na koī chāhne vaalā thā tumhārā
marte the hamīñ jaan se bezār hamīñ the

bad-nām mohabbat ne tirī ham ko kiyā thā
rusvā-e-sar-e-kūcha-o-bāzār hameñ the

dil Thokareñ khātā thā na har gaam kisī kā
ik ḳhaak meñ milte dam-e-raftār hamīñ the

bhaḌkāne se 'ātish' ko jalāne lage yā to
altāf-o-ināyat ke sazā-vār hamīñ the

KHwahan tere har rang mein ai yar hamin the
yusuf tha agar tu to KHaridar hamin the

be-dad ki mahfil mein saza-war hamin the
taqsir kisi ki ho gunahgar hamin the

wada tha hamin se lab-e-baam aane ka hona
saye ki tarah se pas-e-diwar hamin the

kanghi teri zulfon ki hamin par thi muqarrar
aaina dikhate tujhe har bar hamin the

neamat thi tere husn ki hisse mein hamare
tu kan-e-malahat tha KHaridar hamin the

sauda-zada zulfon ka na tha apne siwa ek
aazad do-alam tha giraftar hamin the

tu aur hum ai dost the yak-jaan do qalib
tha ghair siwa apne jo tha yar hamin the

bimar-e-mohabbat tha siwa apne na koi
ek mustahiq-e-sharbat-e-didar hamin the

be apne bahalti thi tabiat na kisi se
dil-soz hamin the tere gham-KHwar hamin the

ek jumbish-e-mizhgan se ghash aata tha hamin ko
do nargis-e-bimar ke bimar hamin the

jab chahte the lete the aaghosh mein tum ko
majbur se rah jate the muKHtar hamin the

hum sa na koi chahne wala tha tumhaara
marte the hamin jaan se bezar hamin the

bad-nam mohabbat ne teri hum ko kiya tha
ruswa-e-sar-e-kucha-o-bazar hamein the

dil Thokaren khata tha na har gam kisi ka
ek KHak mein milte dam-e-raftar hamin the

bhaDkane se 'atish' ko jalane lage ya to
altaf-o-inayat ke saza-war hamin the

Source: Kulliyat-e-Khwaja Haidar Ali Aatish