jaib o garebāñ TukḌe TukḌe dāman ko bhī taar kiyā
kaise kaise ham ne apnī vahshat kā iz.hār kiyā

tauq-o-salāsil ham ne pahne ḳhud ko supurd-dār kiyā
ham ḳhud apnī jaan se guzre tab terā dīdār kiyā

ḳhūn-e-jigar āñkhoñ se bahāyā ġham kā sahrā paar kiyā
terī tamannā kī kyā ham ne jīvan ko āzār kiyā

rañj-o-alam kī bastī meñ ham ab tak tanhā tanhā haiñ
tum se thī ummīd-e-vafā so tum ne bhī inkār kiyā

husn vafā ḳhuddārī ġhairat har ik kī nīlām huī
ham logoñ ne āḳhir ik din bastī ko bāzār kiyā

rāh-e-amal meñ baazī āḳhir ik din tum hī jiit ga.e
ham ne vafā ik baar agar kī tum ne sitam sau baar kiyā

ham to 'zafar' har aan usī ke ġham meñ Duube rahte haiñ
jis ne ġham kī daulat baḳhshī ham pe baḌā upkār kiyā

jaib o gareban TukDe TukDe daman ko bhi tar kiya
kaise kaise hum ne apni wahshat ka izhaar kiya

tauq-o-salasil hum ne pahne KHud ko supurd-dar kiya
hum KHud apni jaan se guzre tab tera didar kiya

KHun-e-jigar aankhon se bahaya gham ka sahra par kiya
teri tamanna ki kya hum ne jiwan ko aazar kiya

ranj-o-alam ki basti mein hum ab tak tanha tanha hain
tum se thi ummid-e-wafa so tum ne bhi inkar kiya

husn wafa KHuddari ghairat har ek ki nilam hui
hum logon ne aaKHir ek din basti ko bazar kiya

rah-e-amal mein bazi aaKHir ek din tum hi jit gae
hum ne wafa ek bar agar ki tum ne sitam sau bar kiya

hum to 'zafar' har aan usi ke gham mein Dube rahte hain
jis ne gham ki daulat baKHshi hum pe baDa upkar kiya