sāvan kī purvā.ī ne kyā dukhtī choT dikhā.ī hai
kaise aañsū umDe haiñ jab yaad tumhārī aa.ī hai

aañkh se ojhal ho kar dil ko apnī yaad dilā.ī hai
dil hī meñ aa baiThe ho ye aur qayāmat Dhaa.ī hai

aaheñ sard huī jaatī haiñ tum aa.e ho yā sub.h huī
chāñd kī rañgat phīkī hai tāroñ pe udāsī chhā.ī hai

ik sannāTā sā taarī hai chār-pahar ke taḌke se
ḳhair to hai ye aaj marīz-e-hijr ne kyā Thahrā.ī hai

duniyā kā dastūr yahī hai dil yuuñ kab tak ro.egā
in achchhī sūrat vāloñ ne kis se piit nibhā.ī hai

bādal chīḳh uThā hai bijlī TuuT paḌī hai tharrā kar
jab ham ne apnī barsī-barsā.ī aañkh uThā.ī hai

jism ke andar dil kī bechainī se ye ma.alūm huā
is ghar meñ sab chīzeñ apnī haiñ ye chiiz parā.ī hai

ab marnā bhī mushkil hai vo pūchh rahe haiñ bālīñ par
kis ne us ko yaad kiyā hai kaisī hichkī aa.ī hai

tum āḳhir kyuuñ kuḌhte ho 'tālib' ke rone-dhone par
duniyā is par hañstī hai sab kahte haiñ saudā.ī hai

sawan ki purwai ne kya dukhti choT dikhai hai
kaise aansu umDe hain jab yaad tumhaari aai hai

aankh se ojhal ho kar dil ko apni yaad dilai hai
dil hi mein aa baiThe ho ye aur qayamat Dhai hai

aahen sard hui jati hain tum aae ho ya subh hui
chand ki rangat phiki hai taron pe udasi chhai hai

ek sannaTa sa tari hai chaar-pahar ke taDke se
KHair to hai ye aaj mariz-e-hijr ne kya Thahrai hai

duniya ka dastur yahi hai dil yun kab tak roega
in achchhi surat walon ne kis se pit nibhai hai

baadal chiKH uTha hai bijli TuT paDi hai tharra kar
jab hum ne apni barsi-barsai aankh uThai hai

jism ke andar dil ki bechaini se ye malum hua
is ghar mein sab chizen apni hain ye chiz parai hai

ab marna bhi mushkil hai wo puchh rahe hain baalin par
kis ne us ko yaad kiya hai kaisi hichki aai hai

tum aaKHir kyun kuDhte ho 'talib' ke rone-dhone par
duniya is par hansti hai sab kahte hain saudai hai

Source: