dīvāngī meñ apnā pata pūchhtā huuñ maiñ
ai ishq is maqām pe to aa gayā huuñ maiñ

Dar hai ki dam na toḌ duuñ ghuT ghuT ke ek din
barsoñ se apne jism ke andar paḌā huuñ maiñ

tūfāñ meñ jo na bujh sake hoñge vo aur log
āñdhī se iḳhtilāf meñ aksar bujhā huuñ maiñ

lagtā hai lauT jā.egī māyūs niiñd phir
masrūf us kī yādoñ meñ baiThā huā huuñ maiñ

in hādsoñ se kah de zarā sabr to kareñ
ai ziist terī bazm meñ bilkul nayā huuñ maiñ

kirdār aadhe mar chuke aadhe palaT ga.e
is vaqt kyuuñ fasāne meñ laayā gayā huuñ maiñ

raushan karo mujhe ki zarā tīrgī haTe
bekār kab se taaq pe rakkhā huā huuñ maiñ

aa aa ke kyuuñ Thahartī haiñ mujh meñ hī ḳhvāhisheñ
hotel huuñ yā sarā.e huuñ batlāo kyā huuñ maiñ

sau baar imtihān zarūrī hai kyā mirā
kaafī nahīñ hai kah diyā tujh se tirā huuñ maiñ

kuchh to chamak dikhe mire ash.ār meñ mujhe
muddat se shā.erī meñ lahū thūktā huuñ maiñ

diwangi mein apna pata puchhta hun main
ai ishq is maqam pe to aa gaya hun main

Dar hai ki dam na toD dun ghuT ghuT ke ek din
barson se apne jism ke andar paDa hun main

tufan mein jo na bujh sake honge wo aur log
aandhi se iKHtilaf mein aksar bujha hun main

lagta hai lauT jaegi mayus nind phir
masruf us ki yaadon mein baiTha hua hun main

in hadson se kah de zara sabr to karen
ai zist teri bazm mein bilkul naya hun main

kirdar aadhe mar chuke aadhe palaT gae
is waqt kyun fasane mein laya gaya hun main

raushan karo mujhe ki zara tirgi haTe
bekar kab se taq pe rakkha hua hun main

aa aa ke kyun Thaharti hain mujh mein hi KHwahishen
hotel hun ya sarae hun batlao kya hun main

sau bar imtihan zaruri hai kya mera
kafi nahin hai kah diya tujh se tera hun main

kuchh to chamak dikhe mere ashaar mein mujhe
muddat se shaeri mein lahu thukta hun main