bahut jabīn-o-ruḳh-o-lab bahut qad-o-gesū
talab hai shart-e-sukūñ ke hazār-hā pahlū

jo be-ḳhudī hai salāmat to mil hī jā.egā
barā-e-fursat-e-andesha yaar kā zaanū

hazār dasht-e-balā halqa-e-asar meñ haiñ
mirā junūñ hai ki chashm-e-ġhazāl kā jaadū

ye raaz khol diyā terī kam-nigāhī ne
sukūñ kī ek nazar dard ke bahut pahlū

sabā hazār kare bū-e-gul kī āmezish
na dab sakegī tire jism-e-nāz kī ḳhushbū

ik iztirāb-e-hasīñ hai fishār-e-tañgī-e-mai
kanār-e-shauq meñ tū hai ki daam meñ aahū

bahut hai ahl-e-basīrat ko ek jalva bhī
vafūr-e-tishna-labī ho agar to ḳham hai subū

junūñ aur ahl-e-junūñ kā vo qaht hai 'tābish'
uThā na dasht se phir koī na.ara-e-yāhū

bahut jabin-o-ruKH-o-lab bahut qad-o-gesu
talab hai shart-e-sukun ke hazar-ha pahlu

jo be-KHudi hai salamat to mil hi jaega
bara-e-fursat-e-andesha yar ka zanu

hazar dasht-e-bala halqa-e-asar mein hain
mera junun hai ki chashm-e-ghazal ka jadu

ye raaz khol diya teri kam-nigahi ne
sukun ki ek nazar dard ke bahut pahlu

saba hazar kare bu-e-gul ki aamezish
na dab sakegi tere jism-e-naz ki KHushbu

ek iztirab-e-hasin hai fishaar-e-tangi-e-mai
kanar-e-shauq mein tu hai ki dam mein aahu

bahut hai ahl-e-basirat ko ek jalwa bhi
wafur-e-tishna-labi ho agar to KHam hai subu

junun aur ahl-e-junun ka wo qaht hai 'tabish'
uTha na dasht se phir koi nara-e-yahu

Source: Funoon(Jadeed Ghazal Number: Volume-002)