tumhārī yaad ke jab zaḳhm bharne lagte haiñ
kisī bahāne tumheñ yaad karne lagte haiñ

hadīs-e-yār ke unvāñ nikharne lagte haiñ
to har harīm meñ gesū sañvarne lagte haiñ

har ajnabī hameñ mahram dikhā.ī detā hai
jo ab bhī terī galī se guzarne lagte haiñ

sabā se karte haiñ ġhurbat-nasīb zikr-e-vatan
to chashm-e-sub.h meñ aañsū ubharne lagte haiñ

vo jab bhī karte haiñ is nutq o lab kī baḳhiya-garī
fazā meñ aur bhī naġhme bikharne lagte haiñ

dar-e-qafas pe añdhere kī mohr lagtī hai
to 'faiz' dil meñ sitāre utarne lagte haiñ

tumhaari yaad ke jab zaKHm bharne lagte hain
kisi bahane tumhein yaad karne lagte hain

hadis-e-yar ke unwan nikharne lagte hain
to har harim mein gesu sanwarne lagte hain

har ajnabi hamein mahram dikhai deta hai
jo ab bhi teri gali se guzarne lagte hain

saba se karte hain ghurbat-nasib zikr-e-watan
to chashm-e-subh mein aansu ubharne lagte hain

wo jab bhi karte hain is nutq o lab ki baKHiya-gari
faza mein aur bhi naghme bikharne lagte hain

dar-e-qafas pe andhere ki mohr lagti hai
to 'faiz' dil mein sitare utarne lagte hain

Videos
This video is playing from YouTube Videos
This video is playing from YouTube Bharti Vishvanathan RECITATIONS Faiz Ahmad Faiz



00:00/00:00 tumhaari yaad ke jab zaKHm bharne lagte hain Faiz Ahmad Faiz

Source: Book : Nuskha Hai Wafa (Pg. 133)