hai vaj.h-e-sukūn-e-dil-e-āshufta-navā bhī
vo aañkh ki hai fitna-e-sad-hūsh-rubā bhī

hai kār-e-junūñ ahl-e-junūñ ke liye āsāñ
ye kaam kabhī ahl-e-farāsat se huā bhī

taskīn-e-dil-o-jāñ hai agar vo ruḳh-e-zebā
us qāmat-e-zebā meñ hai ik hashr chhupā bhī

jo sāmne aa.e to mirī samt na dekhe
detā hai shab-e-hijr vahī mujh ko sadā bhī

utre jo vo siine meñ to ilhām kī sūrat
Thahre to larazne lage shabnam kī ridā bhī

uTThe to qayāmat bhī qadam chuum ke guzre
al-qissa vo andāz hai aafat bhī balā bhī

'hāfiz' mire siine meñ farozāñ hai abhī tak
vo dard sikhātā hai jo jiine kī adā bhī

hai wajh-e-sukun-e-dil-e-ashufta-nawa bhi
wo aankh ki hai fitna-e-sad-hush-ruba bhi

hai kar-e-junun ahl-e-junun ke liye aasan
ye kaam kabhi ahl-e-farasat se hua bhi

taskin-e-dil-o-jaan hai agar wo ruKH-e-zeba
us qamat-e-zeba mein hai ek hashr chhupa bhi

jo samne aae to meri samt na dekhe
deta hai shab-e-hijr wahi mujh ko sada bhi

utre jo wo sine mein to ilham ki surat
Thahre to larazne lage shabnam ki rida bhi

uTThe to qayamat bhi qadam chum ke guzre
al-qissa wo andaz hai aafat bhi bala bhi

'hafiz' mere sine mein farozan hai abhi tak
wo dard sikhata hai jo jine ki ada bhi

Source: Funoon(Jadeed Ghazal Number: Volume-002)