mirī sub.h-e-ġham balā se kabhī shaam tak na pahuñche
mujhe Dar ye hai burā.ī tire naam tak na pahuñche

mire paas kyā vo aate mirā dard kyā miTāte
mirā haal dekhne ko lab-e-bām tak na pahuñche

ho kisī kā mujh pe ehsāñ ye nahīñ pasand mujh ko
tirī sub.h kī tajallī mirī shaam tak na pahuñche

tirī be-ruḳhī pe zālim mirā jī ye chāhtā hai
ki vafā kā mere lab par kabhī naam tak na pahuñche

maiñ fuġhān-e-be-asar kā kabhī mo'tarif nahīñ huuñ
vo sadā hī kyā jo un ke dar-o-bām tak na pahuñche

vo sanam bigaḌ ke mujh se mirā kyā bigāḌ legā
kabhī raaz khol duuñ maiñ to salām tak na pahuñche

mujhe lazzat-e-asīrī kā sabaq paḌhā rahe haiñ
jo nikal ke āshiyāñ se kabhī daam tak na pahuñche

unheñ mehrbāñ samajh leñ mujhe kyā ġharaz paḌī hai
vo karam kā haath hī kyā jo avaam tak na pahuñche

hue faiz-e-mai-kada se sabhī faizyāb lekin
jo ġharīb tishna-lab the vahī jaam tak na pahuñche

jise maiñ ne jagmagāyā usī anjuman meñ saaqī
mirā zikr tak na aa.e mirā naam tak na pahuñche

tumheñ yaad hī na aa.uuñ ye hai aur baat varna
maiñ nahīñ huuñ duur itnā ki salām tak na pahuñche

meri subh-e-gham bala se kabhi sham tak na pahunche
mujhe Dar ye hai burai tere nam tak na pahunche

mere pas kya wo aate mera dard kya miTate
mera haal dekhne ko lab-e-baam tak na pahunche

ho kisi ka mujh pe ehsan ye nahin pasand mujh ko
teri subh ki tajalli meri sham tak na pahunche

teri be-ruKHi pe zalim mera ji ye chahta hai
ki wafa ka mere lab par kabhi nam tak na pahunche

main fughan-e-be-asar ka kabhi mo'tarif nahin hun
wo sada hi kya jo un ke dar-o-baam tak na pahunche

wo sanam bigaD ke mujh se mera kya bigaD lega
kabhi raaz khol dun main to salam tak na pahunche

mujhe lazzat-e-asiri ka sabaq paDha rahe hain
jo nikal ke aashiyan se kabhi dam tak na pahunche

unhen mehrban samajh len mujhe kya gharaz paDi hai
wo karam ka hath hi kya jo awam tak na pahunche

hue faiz-e-mai-kada se sabhi faizyab lekin
jo gharib tishna-lab the wahi jam tak na pahunche

jise main ne jagmagaya usi anjuman mein saqi
mera zikr tak na aae mera nam tak na pahunche

tumhein yaad hi na aaun ye hai aur baat warna
main nahin hun dur itna ki salam tak na pahunche

Source: Book : Jab Fasl-e-baharn aai thi (Pg. 154) Author : padm Shri Dr. Kaleem Ahmed Aajiz Publication : Sunrise Plastic Works, Patna (1990) Edition : 1990