ridā-e-jān pe dohrā azaab buntā huuñ
maiñ roz jāgtī āñkhoñ meñ ḳhvāb buntā huuñ

ḳhayāl-e-husn kī maḳhmal pe tār-e-imkāñ se
kabhī gulāb kabhī māhtāb buntā huuñ

ġhubār-e-ḳhātir-e-paiham se bujh bhī jā.ūñ agar
shab-e-siyah meñ koī āftāb buntā huuñ

libās-e-shauq to muddat kā tār-tār huā
qabā-e-dard pe ab pech-o-tāb buntā huuñ

tilism-e-zulf kī lahreñ Dubo hī detī haiñ
kanār-e-shām jab mauj-e-sharāb buntā huuñ

kabhī maiñ bām-e-mah-e-nau pe Dāltā huuñ kamand
kabhī maiñ ḳhema-e-shahr-e-hijāb buntā huuñ

sulag uThe hai jo sahrā bhī pā-e-vahshat se
to kār-gāh-e-junūñ par sahāb buntā huuñ

jab ek ḳhvāb kā maḳhmal ho tār-tār 'nadīm'
maiñ dasht-e-vahm meñ phir ik sarāb buntā huuñ

rida-e-jaan pe dohra azab bunta hun
main roz jagti aankhon mein KHwab bunta hun

KHayal-e-husn ki maKHmal pe tar-e-imkan se
kabhi gulab kabhi mahtab bunta hun

ghubar-e-KHatir-e-paiham se bujh bhi jaun agar
shab-e-siyah mein koi aaftab bunta hun

libas-e-shauq to muddat ka tar-tar hua
qaba-e-dard pe ab pech-o-tab bunta hun

tilism-e-zulf ki lahren Dubo hi deti hain
kanar-e-sham jab mauj-e-sharab bunta hun

kabhi main baam-e-mah-e-nau pe Dalta hun kamand
kabhi main KHema-e-shahr-e-hijab bunta hun

sulag uThe hai jo sahra bhi pa-e-wahshat se
to kar-gah-e-junun par sahab bunta hun

jab ek KHwab ka maKHmal ho tar-tar 'nadim'
main dasht-e-wahm mein phir ek sarab bunta hun

Source: Vahshat Hi Sahi