kahīñ se koī harf-e-mo'tabar shāyad na aa.e
musāfir lauT kar ab apne ghar shāyad na aa.e

qafas meñ āb-o-dāne kī farāvānī bahut hai
asīroñ ko ḳhayāl-e-bāl-o-par shāyad na aa.e

kise mālūm ahl-e-hijr par aise bhī din aa.eñ
qayāmat sar se guzre aur ḳhabar shāyad na aa.e

jahāñ rātoñ ko paḌ rahte hoñ āñkheñ muuñd kar log
vahāñ mahtāb meñ chehra nazar shāyad na aa.e

kabhī aisā bhī din nikle ki jab sūraj ke hamrāh
koī sāhib-nazar aa.e magar shāyad na aa.e

sabhī ko sahl-añgārī hunar lagne lagī hai
saroñ par ab ġhubār-e-rahguzar shāyad na aa.e

kahin se koi harf-e-mo'tabar shayad na aae
musafir lauT kar ab apne ghar shayad na aae

qafas mein aab-o-dane ki farawani bahut hai
asiron ko KHayal-e-baal-o-par shayad na aae

kise malum ahl-e-hijr par aise bhi din aaen
qayamat sar se guzre aur KHabar shayad na aae

jahan raaton ko paD rahte hon aankhen mund kar log
wahan mahtab mein chehra nazar shayad na aae

kabhi aisa bhi din nikle ki jab suraj ke hamrah
koi sahib-nazar aae magar shayad na aae

sabhi ko sahl-angari hunar lagne lagi hai
saron par ab ghubar-e-rahguzar shayad na aae

RECITATIONS Nomaan Shauque



00:00/00:00 kahin se koi harf-e-motabar shayad na aae Nomaan Shauque