ash.ār kī taḳhlīq meñ jaltā hai jigar kyuuñ
yārab mujhe baḳhshā hai ye jāñ-soz hunar kyuuñ

ġham ishq kī sauġhāt hai siine se lagā le
phūloñ kī tamannā hai to kāñToñ se hazar kyuuñ

kuchh had se sivā haiñ mire ġham-ḳhvār vagarna
rahtī hai mire haal pe yāroñ kī nazar kyuuñ

kal jis ko sar āñkhoñ par biThātā thā zamāna
baiThā hai sar-e-rāh vo ab ḳhāk-basar kyuuñ

aariz ke gulāboñ pe udāsī kī ye shabnam
namnāk haiñ āñkheñ tirī aaj ai gul-e-tar kyuuñ

phir kaun gayā pichhle pahar bazm se uTh kar
phir sog kā aalam hai ye hañgām-e-sahar kyuuñ

patthar ke sivā 'chāñd' yahāñ kuchh na milegā
baiThā hai sajā.e hue shīshoñ kā tū ghar kyuuñ

ashaar ki taKHliq mein jalta hai jigar kyun
yarab mujhe baKHsha hai ye jaan-soz hunar kyun

gham ishq ki saughat hai sine se laga le
phulon ki tamanna hai to kanTon se hazar kyun

kuchh had se siwa hain mere gham-KHwar wagarna
rahti hai mere haal pe yaron ki nazar kyun

kal jis ko sar aankhon par biThata tha zamana
baiTha hai sar-e-rah wo ab KHak-basar kyun

aariz ke gulabon pe udasi ki ye shabnam
namnak hain aankhen teri aaj ai gul-e-tar kyun

phir kaun gaya pichhle pahar bazm se uTh kar
phir sog ka aalam hai ye hangam-e-sahar kyun

patthar ke siwa 'chand' yahan kuchh na milega
baiTha hai sajae hue shishon ka tu ghar kyun

Source: Rooh-e-Ghazal,Pachas Sala Intekhab