dekhe terā rasta phuul
ek akelā tanhā phuul

raat hai chāñd saverā phuul
vo terā ye merā phuul

baaġh meñ jā kar dekh liyā
koī nahīñ thā tujh sā phuul

yuuñ chaurāhoñ kī zīnat
jaise ek tamāshā phuul

maiñ zindāñ aur tanhā.ī
tū gulshan aur kyā kyā phuul

toḌā maslā pheñk diyā
tū ne mere pyaar kā phuul

kāñToñ meñ rahtā hai 'jamīl'
phir bhī sab se achchhā phuul

dekhe tera rasta phul
ek akela tanha phul

raat hai chand sawera phul
wo tera ye mera phul

bagh mein ja kar dekh liya
koi nahin tha tujh sa phul

yun chaurahon ki zinat
jaise ek tamasha phul

main zindan aur tanhai
tu gulshan aur kya kya phul

toDa masla phenk diya
tu ne mere pyar ka phul

kanTon mein rahta hai 'jamil'
phir bhi sab se achchha phul

Source: Book : Khayaabaan (Pg. 113) Author : Hassan Abbas Raza Publication : Bazm-e-Khayaabaan-e-adab, Pakistan