itnā to jānte haiñ ki āshiq fanā huā
aur us se aage baḌh ke ḳhudā jaane kyā huā

shān-e-karam thī ye bhī agar vo judā huā
kyā mehnat-e-talab meñ na hāsil mazā huā

maiñ aur kū-e-ishq mire aur ye nasīb
zauq-e-fanā ḳhizar kī tarah rahnumā huā

pahchāntā vo ab nahīñ dushman ko dost se
kis qaid se asīr-e-mohabbat rihā huā

shāyān-e-darguzar hai agar iztirār meñ
jurm-e-darāz-dasti-e-zauq-e-duā huā

kyā kyā na us ne puure kiye mudda.ā-e-dil
lekin pasand use dil-e-be-mudda.ā huā

us kā pata kisī se na pūchho baḌhe chalo
fitna kisī galī meñ to hogā uThā huā

gul-rūyoñ ke ḳhayāl ne gulshan banā diyā
siina kabhī madīna kabhī karbalā huā

pechīda thī jo sar meñ havā-e-razā-e-dost
'āsī' murīd-e-silsila-e-murtazā huā

itna to jaante hain ki aashiq fana hua
aur us se aage baDh ke KHuda jaane kya hua

shan-e-karam thi ye bhi agar wo juda hua
kya mehnat-e-talab mein na hasil maza hua

main aur ku-e-ishq mere aur ye nasib
zauq-e-fana KHizar ki tarah rahnuma hua

pahchanta wo ab nahin dushman ko dost se
kis qaid se asir-e-mohabbat riha hua

shayan-e-darguzar hai agar iztirar mein
jurm-e-daraaz-dasti-e-zauq-e-dua hua

kya kya na us ne pure kiye muddaa-e-dil
lekin pasand use dil-e-be-muddaa hua

us ka pata kisi se na puchho baDhe chalo
fitna kisi gali mein to hoga uTha hua

gul-ruyon ke KHayal ne gulshan bana diya
sina kabhi madina kabhi karbala hua

pechida thi jo sar mein hawa-e-raza-e-dost
'asi' murid-e-silsila-e-murtaza hua

RECITATIONS Fasih Akmal



00:00/00:00 itna to jaante hain ki aashiq fana hua Fasih Akmal