TuuT kar ahd-e-tamannā kī tarah
mo'tabar ham rahe fardā kī tarah

shauq-e-manzil to bahut hai lekin
chalte haiñ naqsh-e-kaf-e-pā kī tarah

jā mileñge kabhī gulzāroñ se
phailte jā.eñge sahrā kī tarah

dekh kar hāl-e-pareshāñ apnā
ham bhī hañs lete haiñ duniyā kī tarah

kabhī pāyāb kabhī tūfānī
ham bhī haiñ dasht ke dariyā kī tarah

mahfil-e-nāz meñ rahiye lekin
dekhiye chashm-e-tamāshā kī tarah

apne dushman se huuñ vāqif 'tābish'
kisī derīna shanāsā kī tarah

TuT kar ahd-e-tamanna ki tarah
mo'tabar hum rahe farda ki tarah

shauq-e-manzil to bahut hai lekin
chalte hain naqsh-e-kaf-e-pa ki tarah

ja milenge kabhi gulzaron se
phailte jaenge sahra ki tarah

dekh kar haal-e-pareshan apna
hum bhi hans lete hain duniya ki tarah

kabhi payab kabhi tufani
hum bhi hain dasht ke dariya ki tarah

mahfil-e-naz mein rahiye lekin
dekhiye chashm-e-tamasha ki tarah

apne dushman se hun waqif 'tabish'
kisi derina shanasa ki tarah

Source: Book : Mujalla Dastavez (Pg. 186) Author : Aziz Nabeel Publication : Edarah Dastavez (2010) Edition : 2010