Subscribe to our newsletter and get our newest updates

Zahid Farani

  • Ghazal


wahi laDki wahi laDka purana


vahī laḌkī vahī laḌkā purānā
kahīñ hotā hai ye qissa purānā

akele-pan meñ ab ik tāzgī hai
huā jaatā hai har rishta purānā

jahān-e-aql kā insān jāhil
nayā juġhrāfiya naqsha purānā

jahāñ dekho vahī farsūda manzar
jidhar niklo vahī rasta purānā

nayā shā.ir bhī uljhā hai zabāñ meñ
ye ustādoñ se bhī niklā purānā

na uktāo jo be-par kī uḌaa.e
ki 'zāhid' yaar hai apnā purānā

wahi laDki wahi laDka purana
kahin hota hai ye qissa purana

akele-pan mein ab ek tazgi hai
hua jata hai har rishta purana

jahan-e-aql ka insan jahil
naya jughrafiya naqsha purana

jahan dekho wahi farsuda manzar
jidhar niklo wahi rasta purana

naya shair bhi uljha hai zaban mein
ye ustadon se bhi nikla purana

na uktao jo be-par ki uDae
ki 'zahid' yar hai apna purana


Source: Funoon(Jadeed Ghazal Number: Volume-002)

Leave a comment

+