kabhī ishq se kabhī pyaar se
kabhī mausamoñ kī bahār se

shab-e-hijr raushnī ho ga.ī
mire āñsūoñ kī qatār se

na bahal sakī na nikal sakī
tire dil ke ek bhī taar se

na hī tere dil meñ Thahar sakī
kabhī iztirāb-o-qarār se

maiñ nikal ke ab kahāñ jā.ūñgī
tirī chāhatoñ ke hisār se

ye jo chashm-e-'māham' ubal paḌī
tire ḳhvāb hī ke ḳhumār se

kabhi ishq se kabhi pyar se
kabhi mausamon ki bahaar se

shab-e-hijr raushni ho gai
mere aansuon ki qatar se

na bahal saki na nikal saki
tere dil ke ek bhi tar se

na hi tere dil mein Thahar saki
kabhi iztirab-o-qarar se

main nikal ke ab kahan jaungi
teri chahaton ke hisar se

ye jo chashm-e-'maham' ubal paDi
tere KHwab hi ke KHumar se

Source: Book : Word File Mail By Salim Saleem