vo āftāb meñ hai aur na māhtāb meñ hai
jo raushnī ki tire husn-e-be-naqāb meñ hai

chaman meñ lāla-o-gul sharmsār hote haiñ
ajab tarah kā asar husn-e-be-naqāb meñ hai

maiñ apne ishq-e-farāvāñ pe naaz kartā huuñ
mirā kamāl mire husn-e-intiḳhāb meñ hai

ujaḌ gayā hai mirā gulshan-e-hayāt magar
junūn-e-shauq mirā ālam-e-shabāb meñ hai

najāt us kī ba-juz āshiqī nahīñ hogī
phañsā huā jo zamāne ke pech-o-tāb meñ hai

vo bazm-e-shauq meñ shāmil kabhī nahīñ hogā
jo bevaqūf ki uljhā huā hisāb meñ hai

vo valvala hai mirī zindagī kī rūh-e-ravāñ
jo valvala ki mire shauq-e-be-hisāb meñ hai

vo be-naqāb kiyā jiddat-e-taḳhayyul ne
jo rāz-e-kohna rivāyāt ke naqāb meñ hai

ma.āl-e-josh-e-amal sar-bulandī-e-qatra
ye rāz-e-zīst nihāñ ḳhema-e-habāb meñ hai

sukūt meñ hai zamāne kī maut poshīda
hayāt vo hai jo har lahza iztirāb meñ hai

mujhe qubūl nahīñ roz-o-shab kī ḳhāmoshī
mirī hayāt faqat shor-e-inqalāb meñ hai

wo aaftab mein hai aur na mahtab mein hai
jo raushni ki tere husn-e-be-naqab mein hai

chaman mein lala-o-gul sharmsar hote hain
ajab tarah ka asar husn-e-be-naqab mein hai

main apne ishq-e-farawan pe naz karta hun
mera kamal mere husn-e-intiKHab mein hai

ujaD gaya hai mera gulshan-e-hayat magar
junun-e-shauq mera aalam-e-shabab mein hai

najat us ki ba-juz aashiqi nahin hogi
phansa hua jo zamane ke pech-o-tab mein hai

wo bazm-e-shauq mein shamil kabhi nahin hoga
jo bewaquf ki uljha hua hisab mein hai

wo walwala hai meri zindagi ki ruh-e-rawan
jo walwala ki mere shauq-e-be-hisab mein hai

wo be-naqab kiya jiddat-e-taKHayyul ne
jo raaz-e-kohna riwayat ke naqab mein hai

maal-e-josh-e-amal sar-bulandi-e-qatra
ye raaz-e-zist nihan KHema-e-habab mein hai

sukut mein hai zamane ki maut poshida
hayat wo hai jo har lahza iztirab mein hai

mujhe qubul nahin roz-o-shab ki KHamoshi
meri hayat faqat shor-e-inqalab mein hai

Source: Junun-e-Shauq