dekhiye ahl-e-mohabbat hameñ kyā dete haiñ
kūcha-e-yār meñ ham kab se sadā dete haiñ

roz ḳhushbū tirī laate haiñ sabā ke jhoñke
ahl-e-gulshan mirī vahshat ko havā dete haiñ

manzil-e-sham.a tak āsān rasā.ī ho jaa.e
is liye ḳhaak patañgoñ kī uḌā dete haiñ

sū-e-sahrā bhī zarā ahl-e-ḳhirad ho aao
kuchh bahāroñ kā patā ābla-pā dete haiñ

mujh ko ahbāb ke altāf-o-karam ne maarā
log ab zahr ke badle bhī davā dete haiñ

saath chaltā hai koī aur bhī sū-e-manzil
mujh ko dhokā mire naqsh-e-kaf-e-pā dete haiñ

zindagī marg-e-musalsal hai magar ai 'tābish'
haa.e vo log jo jiine kī duā dete haiñ

dekhiye ahl-e-mohabbat hamein kya dete hain
kucha-e-yar mein hum kab se sada dete hain

roz KHushbu teri late hain saba ke jhonke
ahl-e-gulshan meri wahshat ko hawa dete hain

manzil-e-shama tak aasan rasai ho jae
is liye KHak patangon ki uDa dete hain

su-e-sahra bhi zara ahl-e-KHirad ho aao
kuchh bahaaron ka pata aabla-pa dete hain

mujh ko ahbab ke altaf-o-karam ne mara
log ab zahr ke badle bhi dawa dete hain

sath chalta hai koi aur bhi su-e-manzil
mujh ko dhoka mere naqsh-e-kaf-e-pa dete hain

zindagi marg-e-musalsal hai magar ai 'tabish'
hae wo log jo jine ki dua dete hain

Source: Book : Ghazal Calendar-2015 (Pg. 23.03.2015)