yahī hai ishq kī mushkil to mushkil āsāñ hai
milā hai dard vo dil ko jo rāhat-e-jāñ hai

tirī nigāh samajhtī hai yā nahīñ dekhūñ
lab-e-ḳhamosh meñ koī savāl pinhāñ hai

murād-e-zauq ḳharābī kī ab bar aa.egī
ki dil kī taak meñ vo chashm-e-fitna-sāmāñ hai

farāġh-e-hauslagī par junūñ kī shāhid hai
vo ek chaak jo dāman se tā-garebāñ hai

ye be-ḳhudī hai mire aish-e-zindagī kī kafīl
nigāh-e-shauq abhī mahv-e-rū-e-jānāñ hai

balā-kashoñ kī duā hai ki ai ḳhudā na miTe
jigar kā daaġh ki chashm-o-charāġh-e-hijrāñ hai

havā hai shauq-e-suḳhan dil meñ mauj-zan 'vahshat'
ki ham-safīr mirā ro.ab sā suḳhan-dāñ hai

yahi hai ishq ki mushkil to mushkil aasan hai
mila hai dard wo dil ko jo rahat-e-jaan hai

teri nigah samajhti hai ya nahin dekhun
lab-e-KHamosh mein koi sawal pinhan hai

murad-e-zauq KHarabi ki ab bar aaegi
ki dil ki tak mein wo chashm-e-fitna-saman hai

faragh-e-hauslagi par junun ki shahid hai
wo ek chaak jo daman se ta-gareban hai

ye be-KHudi hai mere aish-e-zindagi ki kafil
nigah-e-shauq abhi mahw-e-ru-e-jaanan hai

bala-kashon ki dua hai ki ai KHuda na miTe
jigar ka dagh ki chashm-o-charagh-e-hijran hai

hawa hai shauq-e-suKHan dil mein mauj-zan 'wahshat'
ki ham-safir mera roab sa suKHan-dan hai

Source: Rooh-e-Ghazal,Pachas Sala Intekhab