dil-e-barbād ko chhoTā sā makāñ bhī degā
jab nayā zaḳhm bharegā to nishāñ bhī degā

pahle guzrūñgā maiñ ummīd o yaqīñ kī rah se
phir tirā pyaar mujhe vahm-o-gumāñ bhī degā

paikar-e-rañg jo pal bhar meñ bikhar jā.egā
jāgtī āñkhoñ ko ḳhvāboñ kā jahāñ bhī degā

tum jalānā mujhe chāho to jalā do lekin
naḳhl-e-tāza jo jalegā to dhuāñ bhī degā

vaqt detā hai jinheñ aaj khilaune 'aḳhtar'
unhīñ atfāl ko kal tīr-o-sināñ bhī degā

dil-e-barbaad ko chhoTa sa makan bhi dega
jab naya zaKHm bharega to nishan bhi dega

pahle guzrunga main ummid o yaqin ki rah se
phir tera pyar mujhe wahm-o-guman bhi dega

paikar-e-rang jo pal bhar mein bikhar jaega
jagti aankhon ko KHwabon ka jahan bhi dega

tum jalana mujhe chaho to jala do lekin
naKHl-e-taza jo jalega to dhuan bhi dega

waqt deta hai jinhen aaj khilaune 'aKHtar'
unhin atfal ko kal tir-o-sinan bhi dega

Source: Book : Tahreek Silver Jubilee Number (Pg. 432) Author : Gopal Mittal, Makhmoor Saeedi, Prem Gopal Mittal Publication : Monthly Tahreek, 9, Ansari Market, Daryaganj, New Delhi-110002 (July, Aug., Sep. Oct. 1978,Volume No. 26,Issue No. 4,5,6,7,) Edition : July, Aug., Sep. Oct. 1978,Volume No. 26,Issue No. 4,5,6,7,