aag jo bāhar hai pahuñchegī andar bhī
saa.e jal jā.eñge aur phir paikar bhī

terī āñkhoñ meñ aañsū bhī dekhe haiñ
tere hāthoñ meñ dekhā hai ḳhanjar bhī

pārakh hai to mujh ko parakh hushyārī se
maiñ ik gauhar bhī huuñ maiñ ik patthar bhī

ḳhvāboñ meñ bhī rahtā huuñ bechain bahut
chain nahīñ miltā hai mujh ko so kar bhī

kab tak jañg laḌegā tere sūraj se
sūkhegā ik din āḳhir ye sāgar bhī

shafaq-e-shām kā din bhar thā armān mujhe
ḳhūn-ālūda niklā hai ye manzar bhī

phuul kī patī bhī hai baar mujhe 'manzūr'
dekhoge to lagtā huuñ ik patthar bhī

aag jo bahar hai pahunchegi andar bhi
sae jal jaenge aur phir paikar bhi

teri aankhon mein aansu bhi dekhe hain
tere hathon mein dekha hai KHanjar bhi

parakh hai to mujh ko parakh hushyari se
main ek gauhar bhi hun main ek patthar bhi

KHwabon mein bhi rahta hun bechain bahut
chain nahin milta hai mujh ko so kar bhi

kab tak jang laDega tere suraj se
sukhega ek din aaKHir ye sagar bhi

shafaq-e-sham ka din bhar tha arman mujhe
KHun-aluda nikla hai ye manzar bhi

phul ki pati bhi hai bar mujhe 'manzur'
dekhoge to lagta hun ek patthar bhi

Source: Book : Natamam (Pg. 18) Author : Hakeem Manzoor Publication : Samt Publication 2/48 Rajendar Nagar New Delhi-10060 (1977) Edition : 1977