Subscribe to our newsletter and get our newest updates

Mahir Abdul Hayee

  • Ghazal


dil ka sarmaya liye tu bhi koi bazar dekh


dil kā sarmāya liye tū bhī koī bāzār dekh
tere dushman kā chamak uTThā hai kārobār dekh

jis pe chalne kā sila hai manzil-e-amn-o-sukūñ
khīñch dī hai vaqt ne us raah meñ dīvār dekh

rūh-e-tāza kaun phūñkegā tan-e-be-rūh meñ
lashkar-e-darmāndagāñ hai be-sipah-sālār dekh

hijratoñ ke silsile baaqī haiñ duniyā meñ abhī
lekin ab DhūñDe se bhī milte nahīñ ansār dekh

jaan de kar jaan lī tū ne bhalā ye kyā kiyā
terī qurbānī huī mere gale kā haar dekh

jis kī ḳhushbū se mo.attar hai mashām-e-zindagī
be-vaqār-e-vazn phirtā hai vo nāfa-dār dekh

ai sarāpā-sham.a bazm-e-māh-o-anjum se nikal
kin añdheroñ ko hai terī raushnī darkār dekh

dāman-e-dil bhar ke le jaate haiñ arbāb-e-nazar
be-navā darvesh kā darbār hai darbār dekh

kis ke roke se rukī hai gardish-e-lail-o-nahār
zulmat-e-shab ke pujārī sub.h ke āsār dekh

kab talak gā.egā 'māhir' azmat-e-māzī ke giit
asr-e-nau kī roz-afzūñ garmī-e-bāzār dekh

dil ka sarmaya liye tu bhi koi bazar dekh
tere dushman ka chamak uTTha hai karobar dekh

jis pe chalne ka sila hai manzil-e-amn-o-sukun
khinch di hai waqt ne us rah mein diwar dekh

ruh-e-taza kaun phunkega tan-e-be-ruh mein
lashkar-e-darmandagan hai be-sipah-salar dekh

hijraton ke silsile baqi hain duniya mein abhi
lekin ab DhunDe se bhi milte nahin ansar dekh

jaan de kar jaan li tu ne bhala ye kya kiya
teri qurbani hui mere gale ka haar dekh

jis ki KHushbu se moattar hai masham-e-zindagi
be-waqar-e-wazn phirta hai wo nafa-dar dekh

ai sarapa-shama bazm-e-mah-o-anjum se nikal
kin andheron ko hai teri raushni darkar dekh

daman-e-dil bhar ke le jate hain arbab-e-nazar
be-nawa darwesh ka darbar hai darbar dekh

kis ke roke se ruki hai gardish-e-lail-o-nahaar
zulmat-e-shab ke pujari subh ke aasar dekh

kab talak gaega 'mahir' azmat-e-mazi ke git
asr-e-nau ki roz-afzun garmi-e-bazar dekh


Source: Book : Hari Sonahri Khak (Ghazal) (Pg. 129) Author : Mahir Abdul Hayee Publication : Bazme-e-Urdu,Mau (2008) Edition : 2008

Leave a comment

+