haiñ kis liye udaas koī pūchhtā nahīñ
rasta ḳhud apne ghar kā hameñ sūjhtā nahīñ

naqsh-e-vafā kisī kā koī DhūñDhtā nahīñ
ahl-e-vafā kā phir bhī bharam TūTtā nahīñ

ahl-e-hunar kī baat thī ahl-e-nazar ke saath
ab to koī bhī un kī taraf dekhtā nahīñ

ham se huī ḳhatā to burā mānte ho kyuuñ
ham bhī to aadmī haiñ koī devtā nahīñ

dāman tumhārā haath se jaatā rahā magar
ik rishta-e-ḳhayāl hai ki TūTtā nahīñ

sūraj ke nuur par bhī añdheroñ kā raaj hai
ai 'dard' duur tak mujhe kuchh sūjhtā nahīñ

hain kis liye udas koi puchhta nahin
rasta KHud apne ghar ka hamein sujhta nahin

naqsh-e-wafa kisi ka koi DhunDhta nahin
ahl-e-wafa ka phir bhi bharam TuTta nahin

ahl-e-hunar ki baat thi ahl-e-nazar ke sath
ab to koi bhi un ki taraf dekhta nahin

hum se hui KHata to bura mante ho kyun
hum bhi to aadmi hain koi dewta nahin

daman tumhaara hath se jata raha magar
ek rishta-e-KHayal hai ki TuTta nahin

suraj ke nur par bhi andheron ka raj hai
ai 'dard' dur tak mujhe kuchh sujhta nahin

Source: Intikhab Apna Apna