qaid-e-ulfat kā maza zulf-e-girah-gīr meñ hai
bas yahī rañg mire ḳhvāb kī ta.abīr meñ hai

mīThī mīThī sī kasak us ke bhī dil meñ hogī
halkī halkī sī khanak paañv kī zanjīr meñ hai

us ko tahqīr kī nazroñ se na dekho yaaro
rañg kirdār kā pinhāñ mirī tasvīr meñ hai

kū-ba-kū ek tajassus liye phirtā hai mujhe
ab ye daryūza-garī hī mirī taqdīr meñ hai

ḳhuun ro detā agar tujh pe ayaañ ho jaatā
tū ne samjhā hī kyā jo kuchh mirī tahrīr meñ hai

tum bhī 'ġhāzī' kī tarah dil ke evaz jaañ de do
ishq-e-kāmil kā maza bas isī tadbīr meñ hai

qaid-e-ulfat ka maza zulf-e-girah-gir mein hai
bas yahi rang mere KHwab ki tabir mein hai

miThi miThi si kasak us ke bhi dil mein hogi
halki halki si khanak panw ki zanjir mein hai

us ko tahqir ki nazron se na dekho yaro
rang kirdar ka pinhan meri taswir mein hai

ku-ba-ku ek tajassus liye phirta hai mujhe
ab ye daryuza-gari hi meri taqdir mein hai

KHun ro deta agar tujh pe ayan ho jata
tu ne samjha hi kya jo kuchh meri tahrir mein hai

tum bhi 'ghazi' ki tarah dil ke ewaz jaan de do
ishq-e-kaamil ka maza bas isi tadbir mein hai

Source: Book : Lamhaat (Pg. 109) Author : Yunus Ghazi Publication : Educational Publishing House, Delhi (2010) Edition : 2010