nāyāb hai sukūn dil-e-be-qarār meñ
bismil kī hai taḌap mire kunj-e-mazār meñ

gulzār-e-dahr meñ chaman-e-be-ḳhizāñ huuñ maiñ
laale kā rañg hai jigar-e-dāġh-dār meñ

kāñTā milā hai guuñj kā zulfoñ kā jaal hai
baalī kī machhlī haath lagī hai shikār meñ

nau laakh kī jabhī huī qīmat use nasīb
motī the mere ābloñ ke un ke haar meñ

ayyām-e-aish meñ ruḳh-e-daulat se hai alag
afsos par hamāre kaTe haiñ bahār meñ

jab se uḌī hai ḳhāk-e-alam rashk-e-māhtāb
ik āsmān aur hai mere ġhubār meñ

dhoī huī hai duudh se terī zabān-e-sāf
'aḳhtar' tū hī hai shā.iroñ ke e'tibār meñ

nayab hai sukun dil-e-be-qarar mein
bismil ki hai taDap mere kunj-e-mazar mein

gulzar-e-dahr mein chaman-e-be-KHizan hun main
lale ka rang hai jigar-e-dagh-dar mein

kanTa mila hai gunj ka zulfon ka jal hai
baali ki machhli hath lagi hai shikar mein

nau lakh ki jabhi hui qimat use nasib
moti the mere aablon ke un ke haar mein

ayyam-e-aish mein ruKH-e-daulat se hai alag
afsos par hamare kaTe hain bahaar mein

jab se uDi hai KHak-e-alam rashk-e-mahtab
ek aasman aur hai mere ghubar mein

dhoi hui hai dudh se teri zaban-e-saf
'aKHtar' tu hi hai shairon ke e'tibar mein

Source: Intikhab-e-wajid ali shah akhtar