rañg-e-gul aur lagā mauj-e-sabā aur lagī
kis ke aane se gulistāñ kī fazā aur lagī

aaj maa.il hai vo ikrām-o-ināyāt pe kyā
kyuuñ hameñ kūcha-e-jānāñ kī havā aur lagī

laḌkhaḌāne pe kise raqs kā hotā hai gumāñ
fasl-e-gul aa.ī to phir laġhzish-e-pā aur lagī

dil dhaḌakne ke haiñ ādāb magar tere huzūr
jaane kyuuñ siine meñ dhaḌkan kī adā aur lagī

kis tarah kahtā koī tujh ko sitamgar ai dost
sach to ye hai ki hameñ terī jafā aur lagī

rang-e-gul aur laga mauj-e-saba aur lagi
kis ke aane se gulistan ki faza aur lagi

aaj mail hai wo ikram-o-inayat pe kya
kyun hamein kucha-e-jaanan ki hawa aur lagi

laDkhaDane pe kise raqs ka hota hai guman
fasl-e-gul aai to phir laghzish-e-pa aur lagi

dil dhaDakne ke hain aadab magar tere huzur
jaane kyun sine mein dhaDkan ki ada aur lagi

kis tarah kahta koi tujh ko sitamgar ai dost
sach to ye hai ki hamein teri jafa aur lagi

Source: Book : ©Chirag-e-shab-e-aakhir (Pg. 55) Author : Mahmudul Hasan Publication : Mahmudul Hasan (2016) Edition : 2016