Subscribe to our newsletter and get our newest updates

Nabeel Ahmad Nabeel

  • Ghazal


dur kuchh ahl-e-junun ki be-qarari kijiye


duur kuchh ahl-e-junūñ kī be-qarārī kījiye
ho sake to un kī thoḌī ġham-gusārī kījiye

jin ke bistar se nahīñ jaatī koī silvaT kabhī
un kī āñkhoñ meñ vafā ke ḳhvāb jaarī kījiye

ishq kī qismat yahī hai ishq kā mansab yahī
jāgiye shab-bhar yūñhī aḳhtar-shumārī kījiye

nochiye zaḳhm-e-jigar ko aañkh bhar kar roiye
aur kab tak hijr meñ yuuñ āh-o-zārī kījiye

bhejiye koī bulāvā koī chiTThī bhejiye
apne un pardesiyoñ se shahar-dārī kījiye

log haiñ tayyār hijrat ke liye is shahr se
phir koī taaza nayā farmān jaarī kījiye

phir koī taaza bapā hone ko hai ik ma.arka
nahr-e-furāt-e-karbalā ko phir se jaarī kījiye

kaam aa.egā na koī mushkiloñ meñ dekhnā
jis qadar bhī dostoñ se vaz.a-dārī kījiye

tishna-e-takmīl Thahre baat na koī 'nabīl'
guftugū jitnī bhī hai dil meñ vo saarī kījiye

aa.egā kab saañs varna dūsrā tujh ko 'nabīl'
dil ke zaḳhmoñ kī na aise parda-dārī kījiye

dur kuchh ahl-e-junun ki be-qarari kijiye
ho sake to un ki thoDi gham-gusari kijiye

jin ke bistar se nahin jati koi silwaT kabhi
un ki aankhon mein wafa ke KHwab jari kijiye

ishq ki qismat yahi hai ishq ka mansab yahi
jagiye shab-bhar yunhi aKHtar-shumari kijiye

nochiye zaKHm-e-jigar ko aankh bhar kar roiye
aur kab tak hijr mein yun aah-o-zari kijiye

bhejiye koi bulawa koi chiTThi bhejiye
apne un pardesiyon se shahar-dari kijiye

log hain tayyar hijrat ke liye is shahr se
phir koi taza naya farman jari kijiye

phir koi taza bapa hone ko hai ek marka
nahr-e-furaat-e-karbala ko phir se jari kijiye

kaam aaega na koi mushkilon mein dekhna
jis qadar bhi doston se waza-dari kijiye

tishna-e-takmil Thahre baat na koi 'nabil'
guftugu jitni bhi hai dil mein wo sari kijiye

aaega kab sans warna dusra tujh ko 'nabil'
dil ke zaKHmon ki na aise parda-dari kijiye


Leave a comment

+